Meirihluti kennara finnst vanta meira og fjölbreyttara kennsluefni um hringrásarhagkerfi. Þetta sýna niðurstöður könnunar um stöðu á námsefni um hringrásarhagkerfi og matarsóun í skólum. Könnunin var hluti af Aðgerð 5 í aðgerðaráætlun stjórnvalda Minni matarsóun. Einnig voru lagðar til tillögur að aðgerðum til að bæta þekkingu um matarsóun og hringrásarhagkerfi í skólakerfinu. Könnunin var framkvæmd af Menntavísindastofnun og Menntavísindasviði Háskóla Íslands fyrir Umhverfis- og orkustofnun. Könnunin var lögð fyrir kennara, stjórnendur og kokka- og matráða í skólunum. Heildarniðurstöður má finna á síðu menntavísindastofnunar HÍ.
Mötuneyti að gera góða hluti til að sporna gegn matarsóun
Niðurstöður úr svörum frá kokkum og matráðum sýndu að í yfir helming skólanna skammta nemendur sér sjálfir mat á diskinn í mötuneytum. Þetta hefur verið talin góð leið til að draga úr matarsóun til að nemendur meti sjálf hvaða mat þau muni borða meira af og minna af mat verði sóað. Þá voru 95% matráða og kokka sem telja afganga nýtta á einhvern hátt. Fá svör fengust frá matráðum og kokkum þar sem matur er aðkeyptur, þannig þessi svör endurspegla betur skóla þar sem matur er eldaður frá grunni.
Helmingur kennara vilja meiri fræðslu um matarsóun
Þegar kennarar og stjórnendur voru spurð um matarsóun, svaraði rúmlega helmingur að það vantaði meiri fræðslu um matarsóun, en þó lægra hlutfall leikskólakennara miðað við aðra kennara. Leikskólakennarar vildu flestir bæta kennsluefni um matarsóun og flestir grunnskólakennarar vildu fjölbreyttara kennsluefni. Þá vildu framhaldsskólakennarar flestir auka þekkingu sína á málefninu. Leikskólakennarar nýta helst samtöl við nemendur og fræðslu um matarskammta til að kenna um matarsóun. Í grunnskólum er yfirleitt stuðst við bókina „Halló heimur“ eða myndbönd á youtube. Í framhaldsskólum er matarsóunarkennslan byggð á fræðslu og fyrirlestrum, kennslu um flokkun og kennsluefni í umhverfisfræðum.
Meirihluti kallar eftir meira kennsluefni um hringrásarhagkerfið
Þegar spurt var um hringrásarhagkerfið kom í ljós að þriðjungur framhaldssskóla og leikskóla eru reglulega með skiptimarkaði, en færri grunnskólar. Meirihluti grunn- og framhaldsskólakennara telja vera þörf á meiri kennslu um hringrásarhagkerfið. Ýmsar leiðir voru nefndar til að bæta kennslu/fræðslu um hringrásarhagkerfið, til dæmis að auka þekkingu kennara á efninu, hafa kennsluefni fjölbreyttara og bæta við kennsluefni.
Fjölbreyttar aðgerðatillögur
Menntavísindastofnun og menntavísindasvið HÍ lögðu fram tillögur að aðgerðum til að bæta kennslu og þekkingu kennara á málefnum hringrásarhagkerfis og matarsóunar, byggt á niðurstöðum úr þessari könnun. Þörf er á mismunandi lausnum fyrir mismunandi skólastig, einnig eru tækifæri á mismunandi kennslumöguleikum í kennslustofunni eða með beinni fræðslu í mötuneyti skólanna.
| Tillögur að aðgerðum | Framkvæmd |
| 1. Fræðsla fyrir kennara | – Árlegur fræðsludagur hjá Umhverfis- og orkustofnun fyrir kennara. – Stutt netnámskeið um hringrásarhagkerfið. – Rafrænt stuðningsefni fyrir kennara |
| 2. Auka framboð af fjölbreyttara kennsluefni | – Þróunarstyrkur – Kennsluefni sem hægt er að samtvinna við ólíkar námsgreinar – Leggja áherslu á gagnvirk og verkleg verkefni, sérstaklega fyrir yngsta aldurshópinn. |
| 3. Nýta betur fyrirliggjandi efni | – Miðlæg vefgátt fyrir kennsluefni – Kynningarherferð á því námsefni sem er í boði |
| 4. Fræðsla fyrir kokka/matráða | – Námskeið/vinnustofur – Hvatningakerfi fyrir skólaeldhús til að draga úr matarsóun |
| 5. Gera fræðslu aðgengilega í skólum | – Mötuneytið nýtt sem kennslustofa – Nemendadrifin verkefni |
| 6. Þverfagleg fræðsla | – Þverfagleg verkefni – Raunveruleg verkefni |