Þar sem plast er endingagott efni sem brotnar ekki niður hentar það í raun mun betur í margnota vörur heldur en einnota. Margnota plast þarf að vera:

• Hitaþolið, þar sem meiri hætta eru á því að íblöndunarefni leki úr plastinu þegar það er heitt.
• Laust við hættuleg íblöndunarefni, s.s. BPA, BPS, og BPF, sem getur með tíð og tíma lekið úr plastinu og haft hormónaraskandi áhrif.
• Harðgerðara en einnota plast, þar sem bakteríumyndun er auðveldari ef það myndast sprungur í plastinu.
• Hægt að gera við
• Tímalaus hönnun

Dæmi um notkun á fjölnota plasti er t.d. þegar birgjar koma með vörur í fjölnota burðarkössum til fyrirtækja eða þegar fjölnota ílát eru notuð undir matvæli eða aðrar áfyllingarvörur.

Matvöruverslanir, ísbúðir, sjoppur, fiskbúðir, veitingastaðir og aðrir smásalar geta hæglega afhent viðskiptavinum matvæli í fjölnota ílátum, sjá leiðbeiningar Matvælastofnunar, og/eða boðið upp á fjölnota borðbúnað. Hægt er að bjóða upp á fjölnota ílát og borðbúnað ef borðað er á staðnum, bjóða viðskiptavinum að koma með eigin ílát eða selja slík ílát út með skilagjaldi sem svo er greitt til baka þegar ílátinu er skilað inn. Einnig er hægt að selja aðrar vörur en matvæli í áfyllingu, t.d. hreinsivörur. 

Þá er hægt að styðja enn betur við hringrás umbúða með því að bjóða upp á deiliþjónustur. Umbúðir er nefnilega hægt að endurskilgreina sem þjónustu í stað vöru. Við þekkjum flest deiliþjónustur eins og t.d. Hopp sem gerir fólki kleift að leigja rafskútur og bíla. Hvernig væri ef viðskiptavinir gætu leigt ílát á einum stað og skilað þeim á öðrum?

 

Plast er mjög endingagott efni og hægt er að lengja líftíma ýmissa plastvara enn fremur með því að gera við þær. Fyrirtæki geta boðið viðskiptavinum sínum upp á slíka þjónustu, en geta einnig sinnt slíku viðhaldi fyrir margnota plastvörur sem þau nýta.

Hægt er að laga plast með því að nota plastlím af réttri gerð. Ef plastlímið dugir ekki til er hægt að bræða plastið með lóðbolta og laga þannig rifur og göt. Mikilvægt er að huga að öryggi við plastviðgerðir svo að starfsmenn andi ekki að sér hættulegum gufum og nýta viðeigandi hlífðarbúnað og grímur.

Gott er að hafa eftirfarandi atriði á hreinu:

• Tekur sorphirðan að sér að safna tilteknu plasti?
• Getur endurvinnsluaðilinn endurunnið plastið?
• Er eftirspurn eftir endurunna plastinu?
• Eru umbúðirnar merktar með réttum merkingum?
  • Merkingar um flokkun
    • Sjá flokkunarmerkingar FENÚR á www.fenur.is
  • Plastmerkingar, þ.e. endurvinnsluþríhyrningur með númeri plasttegundar inní
    • Sjá hér undir Hvað er plast

Atriði sem auðvelda endurvinnslu:

Hreinn úrgangsstraumur
Ekki samblanda af plasti og pappa eða öðru efni.

Velja lit á umbúðum sem hentar endurvinnsluferlinu
Best er að sleppa litarefnum alveg. Svartir og dökkir litir henta mjög illa til endurvinnslu.

Takmarka prentun beint á umbúðirnar
Best er að nota lasermerkingar og/eða takmarka upplýsingar við framleiðsludag eða best fyrir.

Velja merkingar og lím sem hentar endurvinnsluferlinu
Miðar með vatnsleysanlegu lími
Umbúðaermi (e. shrink sleeve) sem er eins lítil og mögulegt er og auðvelt að fjarlægja

 Gæði og eiginleikar

• Endurunnið plast hegðar sér ekki alltaf eins og frumplast. Þá aðallega vegna þess að plast sem fer inn í endurvinnsluna er aldrei fullkomlega hreint, einhver blöndun við önnur efni er nánast óhjákvæmileg. Mikilvægt er að slá af stífum kröfum um lit efnisins, fagurfræðilega eiginleika og frammistöðu og einblína á þá þætti sem eru nauðsynlegir fyrir virkni umbúðanna. Eftir því sem eftirspurnin eykst er þó viðbúið að gæðin aukist einnig.

Matvælaöryggi

• Mörg endurunnin plastefni uppfylla nauðsynlegar kröfur til að tryggja matvælaöryggi. Enn eru samt margir sem eru tortyggnir eða halda að endurunnið plast megi ekki koma í snertingu við mat. Árið 2009 gaf Evrópusambandið út nýja reglugerð um efni og hluti úr endurunnu plasti sem er ætlað að komast í snertingu við matvæli. Reglugerðin hefur verið tekin upp í íslensk lög. Sjá nánar á vef Matvælastofnunar.
• Aðildaríki ESB hafa eftirlit með fyrirtækjum sem framleiða endurunnið plast fyrir matvæli og það er í þeirra höndum að samþykkja framleiðsluferlana. Ef endurvinnslan á plasti á sér stað á Íslandi þá er það í höndum Umhverfisstofnunar að veita slíkum fyrirtækjum ráðgefandi álit.

Umhverfisvitund

• Það að nota endurunnið plast getur komið umhverfisáherslum fyrirtækja til skila á auðveldan og jafnvel sjónrænan hátt. Endurunnið plast verður þá merki um skuldbindingu vörumerkisins við sjálfbærni og getur jafnvel skapað sérstöðu á markaði.

Lagaleg skylda

• Íslensk stjórnvöld hafa sett reglur sem setja einnota plastvörum ýmis takmörk
• Samkvæmt þeim skulu flöskur úr PET plasti innihalda að lágmarki 25% endurunnið plast frá árinu 2025 og frá 2030 skulu allar flöskur sem falla undir ákvæðið innihalda að lágmarki 30% endurunnið plast.
• Samband plastframleiðenda í Evrópu hefur kallað eftir því að Evrópusambandið lögfesti markmið um 30% hlutfall endurunnins plast í öllum plastumbúðum fyrir árið 2030.
• Það er því viðbúið að lögin gangi einn daginn lengra svo það er ekki seinna vænna að byrja að íhuga endurunnið plast sem hráefni í nýjar vörur!

Það er mest eftirspurn eftir endurunnu plasti í háum gæðaflokki, af algengri gerð, og í ljósum lit.

Eftirfarandi plasttegundir henta vel til endurvinnslu og er eftirspurn eftir eins og staðan er í dag:

Heyrúlluplast, PET, rPET, Bio-PET, LDPE, rLDPE, bio-LDPE, HDPE, rHDPE, Bio-HDPE, PP, rPP, Bio-PP

Eftirfarandi plasttegundir henta vel til endurvinnslu en lítil eftirspurn er eftir eins og staðan er í dag:

EPS, PET bakkar, PP filma, önnur filma

Eftirfarandi plasttegundir henta illa til endurvinnslu og því ekki eftirspurn til staðar eins og staðan er í dag:

PVC, PS, PLA, annað lífplast, sellófan, oxo niðurbrjótanlegt plast, samsettar umbúðir (t.d. EVOH, PA, málmhúð, AlOx , SiOx)