Í dag, 22. Nóvember er Hringrásar mánudagur (e. Circular Monday). Dagurinn er mótvægi við ofneyslu vegna Svarts föstudags. Í staðinn fyrir að kaupa nýja hluti á tilboðsdögunum hvetjum við ykkur því til að taka þátt í hringrásinni. 

Hringrásar mánudagur, er framtak sem á uppruna sinn í Svíþjóð, og hefur líka verið kallaður hvítur mánudagur. Á deginum er fólk hvatt til að stunda hringrásar-neyslu (circular consumption), það er að versla notað, nýta deiliþjónustur, viðgerðaþjónustur, fá lánað eða versla einungis umhverfisvottaðar vörur. Skilaboðin eru að maður getur í raun verslað eins mikið og maður vill án þess að ganga á auðlindir jarðar, að því gefnu að maður stundi hringrásar neyslu.  

Afslættir á hringrásinni í tilefni dagsins

Víðsvegar um heim hafa margar second-hand verslanir og viðgerðaþjónustur tekið þátt í hringrásar mánudegi með því að bjóða upp á afslátt á deginum.  Við höfðum samband við fyrirtæki sem við teljum styðja við hringrásarhagkerfi og hvöttum þau til að taka þátt í deginum t.d. með því að bjóða upp á afslátt af vöru eða þjónustu hjá sér. Hér er listi yfir þá sem við vitum að bjóða upp á afslátt:  

Verslun eða þjónusta	Hvar?	Hvað?	Tilboð
Verzlanahöllin	Laugavegur 26, Reykjavík	Básar þar sem hægt er að kaupa og selja notaðn fatnað	25% afsláttur af básaleigu (óháð lengd) með kóðanum CIRCULAR.
Spjara	spjara.is Sundlaugarvegi 34, Reykjavík	Stafræn fataleiga með merkisvöru	Tilboð í dag
Aftur nýtt	Sunnuhlíð 12, Akureyri  afturnytt.is	Básar þar sem hægt er að kaupa og selja notaðan fatnað	20% afsláttur af leigu á básum í dag
Sódavatn	Höfuðborgarsvæðinu  sodavatn.is	Hringrásarþjónusta fyrir sódavatnshylki	Fyrsta hylki frítt ásamt heimsendingu fyrir þá sem skrá sig í áskrift í dag
Vistvera	Efstalandi 26, Reykjavík  Eyrarvegi 5, Selfoss  vistvera.is	Áfyllingavörur, margnota vörur, og plastlausar lausnir	15% afsláttur á öllum vörum
Guðrún Borghildur	Vesturgata 4, Reykjavík  kirs.is/author/gudrun	Endurnýtt hráefni eins og leðurjakkar og gömul tjöld nýtt til að búa til fylgihluti af ýmsu tagi	Tilboð á vörum
Vistvæna búðin	Sunnuhlíð 12, Akureyri	Áfyllingavörur, margnota vörur, og plastlausar lausnir	20-40% afslátt af áfyllingarvörum
ABC nytjamarkaður	Nýbýlavegur 6, 200 Kópavogur	Nytjamarkaður ABC barnahjálpar til styrktar hjálparstarfinu	50% afsláttur á öllum húsgögnum, og allar vínilplötur á 100 kr, eða með 400 kr afslætti.
Extraloppan	Smáralind, Kópavogi  extraloppan.is	Básar þar sem hægt er að kaupa og selja notaðn fatnað	Afsláttur á básaleigu
Barnaloppan	Skeifan 11a, Reykjavík  barnaloppan.is	Básar þar sem hægt er að kaupa og selja notaðn barnafatnað og aðrar barnavörur	Afsláttur á básaleigu

Veist þú um fyrirtæki sem vantar á listann? Sendu okkur línu á ust@ust.is með titlinum Hringrásar mánudagur 

Hér er líka listi yfir hringrásar verslanir sem hægt er að styðja alveg sérstaklega í dag.

Þema dagsins rímar vel við Evrópsku nýtnivikuna sem stendur yfir núna dagana 21.-29. Nóvember. Markmið vikunnar er að hvetja fólk til að draga úr óþarfa neyslu, nýta hluti betur og draga þannig úr sóun.  Hringrásarhagkerfið snýst um að deila, leigja, lagfæra, fá lánað, endurnýta, endurframleiða og endurvinnslu. Þetta er leiðin sem við verðum öll að fara saman, fyrir sjálfbæra framtið og velferð okkar á jörðinni. 

Í nóvember skorar Norden i skolen á alla nemendur í Norðurlöndunum til að beina sjónum sínum að rusli í náttúrunni. Með því að taka þátt í plastkapphlaupinu geta bekkir um öll Norðurlöndin hjálpast að við að bjarga náttúrunni. Þið veljið sjálf hvort þið einbeitið ykkur að sjávarsíðunni, skóglendi, skólalóðinni eða aðra staði þar sem þið teljið að þörfin sé brýn.

Svona farið þið að

1. Leitið uppi stað í náttúrunni þar sem er rusl og þörf á að hreinsa til.
2. Setjið af stað skeiðklukku, hlaupið af stað með bekknum og safnið saman eins miklu og þið getið af plasti, og öðrum efnum sem brotna ekki niður á náttúrulegan hátt, á 15 mínútum.
3. Takið ruslið sem þið söfnuðuð saman með ykkur upp í skóla, myndið nemendurnar með ruslahauginum og hlaðið upp á nordeniskolen.org
4. Flokkið ruslið! Skiptið nemendunum upp í hópa og gerið flokkunina sömuleiðis að skemmtilegri keppni. Hvaða hópur verður fyrstur til að flokka sinn ruslahaug. Ath! Ruslið verður að sjálfsögðu að vera flokkað á réttan hátt!

VINNINGURINN FER Í BEKKJARSJÓÐINN

Þeir bekkir sem taka þátt keppast um sigurlaun sem nema 5000 DKK sem renna rakleiðis í bekkjarsjóðinn. Til að taka þátt þarf bekkurinn í síðasta lagi að skila inn mynd þann 30. nóvember 2021 en þá verður sigurvegarinn dreginn upp úr lukkupotti úr hópi þeirra sem skiluðu inn mynd á www.nordeniskolen.org. Gangi ykkur vel!

Skráning á Norden i skolen

Stefnum saman að nýtnari heimi

Á laugardaginn, 20. nóvember, hefst Nýtnvikan og stendur hún yfir til 28. nóvember. Átakið er samevrópskt og hefur það að markmiði að hvetja fólk til að draga úr óþarfa neyslu, nýta hluti betur og draga þannig úr myndun úrgangs. 

Í ár er þema vikunnar hringrásarsamfélög og er þar vísað til þeirra hvetjandi áhrifa sem að samfélög geta haft til þess að auðvelda fólki að innleiða hjá sér umhverfisvænar hegðunarbreytingar. Samfélög eru skilgreind á eftirfarandi máta á vísindavefnum:

,,Samfélag er hópur fólks sem býr saman í skipulögðum félagsskap. Fólk sem hefur samskipti hvert við annað myndar samfélag, og samfélögin geta verið bæði lítil og stór. Minnstu samfélögin sem maður tilheyrir eru fjölskyldan og vinahópurinn. Næst kemur sveitarfélagið, þá Ísland, Evrópa og loks alheimssamfélagið sem allir íbúar jarðar eru hluti af.“

Það er því ljóst að hringrásarsamfélög geta verið jafn fjölbreytt og þau eru mörg á Íslandi. Í samfélögum býr gífurlegur kraftur og tækifæri til áhrifa. Við mótumst af okkar samfélögum en höfum að sama skapi mikil tækifæri til að móta þau sömuleiðis. Til þess að skapa raunverulegt hringrásarhagkerfi þurfa margir aðilar í ólíkum geirum og af ólíkum stærðargráðum að stefna að sama marki. Hvað hefur atvinnulífið fram á að færa í þessum málum? Hvað geta sveitarfélög gert til að skapa frjóan jarðveg fyrir hringrás í sínu samfélagi? Hvað með vinnustaði? Eða einkaframtakið?

Í tilefni Nýtnivikunnar 2021 langar Umhverfisstofnun að vekja athygli á nokkrum samfélögum sem hafa nú þegar myndast með hringrásarhagkerfið að leiðarljósi og gefa þeim orðið. Saman gegn sóun mun bjóða eftirtöldum aðilum að taka yfir hjá okkur á instagram og facebook í Nýtnivikunni og segja frá sínu starfi og hver þeirra framtíðarsýn er.

Dagskrá:

22. nóvember: Hringrásarmánudagur

23. nóvember: Skútustaðahreppur og fyrirlestur Umhverfisstofnunar um umhverfisvæn jól

24. nóv: Amtsbókasafnið á Akureyri

25.-26. nóv: Jarðgerðarfélagið

27.-28. nóv: Munasafnið segir frá ráðstefnunni og hakkaþoninu ,,Connecting Loops´´

Endilega fylgist með og sendið inn spurningar í gegnum instagram og facebook!

Á morgun er feðradagurinn og mörgum sem finnst mikilvægt að gera eitthvað til að gleðja feður í kringum sig. Smekkur feðra getur verið eins mismunandi og þeir eru margir en við teljum að það gleðji fæsta að fá enn einn hlutinn sem þeim vantar ekki, og stuðla í leiðinni að óþarfa neikvæðum umhverfisáhrifum og sóun.  

Hér eru því nokkrar góðar hugmyndir að því að gleðja feður sem við erum viss um að hitti beint í mark: 

Upplifun

• Útbúa góðan morgunverð eða kaffitíma 
• Elda góðan mat heima 
• Samverustund 
• Bjóða á kaffihús, í drykk eða út að borða 

Gjafabréf

• Skeggsnyrting  
• Út að borða í bröns eða kvöldmat
• Nudd 
• Afþreying sem tengist áhugamáli, t.d. bíó, uppistand, leikhús, tónleikar, keila, píla… 

Nú fer tími neysluhátíða að ganga í garð. Það byrjar með degi einhleypra, síðan kemur svartur föstudagur, sem er farin að teygja anga sína yfir margar vikur, og að ógleymdum jólunum. Dagur einhleypra er haldinn ár hvert ellefta nóvember, eða 11.11. Þann dag eru einhleypir hvattir til þess að fylla upp í tómleikann í lífi sínu með neysluvarningi.

En stemmir það virkilega að einhleypt fólk sé upp til hópa einmana og óhamingjusamt? Og ef svo er, mun neysluvarningur virkilega hjálpa?

Mýta að einhleypir séu óhamingjusamir

Það eru margar rannsóknir sem benda til þess að það sé alls ekki svo neikvætt að vera einhleypur. Til dæmis eru einhleypir duglegri að hreyfa sig heldur en þeir sem eru giftir. Þeir eru líka duglegri að halda sambandi við nágranna, vini, foreldra og systkyni. Það er líka ýmislegt sem bendir til þess að einhleypt fólk hafi í meira mæli brennandi áhuga á því sem það er að gera í vinnunni. Hreyfing, samverustundir og áhugavert starf eru allt hlutir sem stuðla að vellíðan og lífshamingju. Það er því mikilvægt að kaupa ekki mýtuna sem verið er að selja á degi einhleypra um að – „Þú ert ömurlegur, einmana og lífið þitt er sorglegt“.

Efnishyggja og andleg vanlíðan 

En ef svo óheppilega vildi til að þú ert daufur í dálkinn á degi einhleypra, mun neysluvarningur hjálpa? Flestir þekkja það hvernig nýir hlutir geta veitt okkur hamingju, en sú hamingju endist oftast ekki lengi og fljótt kemur löngun í að kaupa eitthvað nýtt. Þetta getur orðið að vítahring neyslu, sem getur verið skaðlegur fyrir andlega heilsu, veskið okkar og umhverfið.  

Efnishyggja er áhersla á að eiga og kaupa hluti til þess að öðlast hamingju, betra sjálfsálit og betra álit annarra. Þessu fylgir að meiri tíma er varið í neyslu, minni sparnaður og að hlutum er oftar skipt út fyrir nýja. Rannsóknir hafa endurtekið gefið til kynna neikvæð áhrif efnishyggju á andlega líðan. Nýleg samantekt rannsókna sýndi skýrt að efnishyggja tengist minni lífsánægju, lægra sjálfsáliti, kvíða- og þunglyndiseinkennum og verri heilsu. 

Þetta bendir því til að sú hugmynd að efnislegir hlutir (t.d. föt, skór, lífstílsvörur) muni veita okkur hamingju geti verið okkur skaðleg. Það er því mikilvægt í neyslusamfélagi eins og á Íslandi að velta fyrir sér hvað veitir okkur raunverulega hamingju. Það getur verið leið til að huga að geðheilsunni.  

Hvað get ég gert í staðinn?

Verum meðvituð þegar við erum að versla um hvort okkur vanti þennan hlut eða hvort auglýsingar hafi talið okkur trú um að lífið okkur verði betra ef við eigum hann. Það er vel hægt að breyta neysluvenjum sínum og þar með hafa einnig meiri tíma og pening til að verja í annað. Minnum okkur reglulega á það sem veitir okkur sanna ánægju, t.d. samvera með fólkinu í kringum okkur eða áhugamálin okkar. 

Hugmyndir fyrir geðheilsuna og umhverfið sem geta komið í stað neyslu: 

• Samverustundir 
• Hugleiðsla 
• Hreyfing 
• Nudd 
• Elda góðan mat  
• Lesa bók eða horfa á mynd  
• Make love, not co2 

Hvenær: 18.nóvember kl.13-16 
Hvar:  Hús atvinnulífsins, Borgartúni 35 – salur á fyrstu hæð.

Grænvangur og Umhverfisstofnun boða til vinnustofu um val á umhverfisvænni umbúðum og ábyrgari notkun á plasti. Vinnustofan er hluti af aðgerðaráætlun stjórnvalda sem miðar að því að leysa okkur Úr viðjum plastsins. 

Í vinnustofunni verður farið yfir leiðbeiningar í vinnslu og atvinnulífinu gefið færi á því að koma með uppbyggilega gagnrýni á efnið svo upplýsingagjöfin geti orðið markvissari og réttari. 

Leiðbeiningarnar eru unnar af Umhverfisstofnun og markmið þeirra er að auðvelda atvinnulífinu ábyrgari notkun á plastumbúðum, t.d. með því að auðvelda þeim val á plastvörum sem hentar til endurnotkunnar og endurvinnslu. Um leið er tilgangur vinnustofunnar að vekja athygli stjórnenda fyrirtækja á þeim sóknarfærum sem felast í að auka virði vöru og þjónustu með því að nýta plast með ábyrgum hætti í starfsemi sinni og draga úr plastnotkun þar sem það er mögulegt.

Við óskum eftir breiðri þátttöku úr atvinnulífinu og biðjum áhugasama um að skrá sig fyrir 12. nóvember 2021. Nánari dagskrá verður send þá þátttakendur þegar nær dregur.

Skráning

Það getur verið hressandi í skammdeginu að gera sér dagamun. Það er því kannski ekki að undra að æ fleiri taka upp þann sið að halda upp á hrekkjavöku með því að klæða sig í ógnvekjandi búninga.

Ógurleg og ógnvekjandi textílsóun

En það sem er kannski mest ógurlegt og ógnvekjandi er textíl sóunin sem hlýst af því að kaupa búning sem er svo bara notaður einu sinni. Textíliðnaðurinn er einn sá umfangsmesti í heimi og honum fylgir gríðarleg efnanotkun, ferskvatnsmengun og losun gróðurhúsalofttegunda. Samkvæmt skilgreiningum Umhverfisstofnunar Evrópu (2014) og Norrænu ráðherranefndarinnar (2015) er textíll fjórði stærsti umhverfisþáttur einstaklinga á eftir húsnæði, samgöngum og matvælum. Áætlað hefur verið að við framleiðslu á einum stuttermabol þurfi í kringum 3.000 lítra af vatni! Þetta ásamt því gríðarlega magni af efnavöru sem notað er í virðiskeðjunni hefur í för með sér mikla mengun á ferskvatni í þeim löndum þar sem framleiðslan fer fram. Sameinuðu þjóðirnar hafa áætlað að um 20% af allri mengun sem finna má í skólpi frá iðnaði sé frá textíliðnaðinum. Í virðiskeðjunni á sér einnig stað losun gróðurhúsalofttegunda en talið er að um 8-10% af heildarlosun gróðurhúsalofttegunda í heiminum megi rekja til textíliðnaðarins. 

Lausnir

Við getum lagt okkar af mörkum með því að velja umhverfisvænni hrekkjavökubúninga. Fyrir utan minni neikvæð umhverfisáhrif getur það verið ódýrara og auðveldara að velja slíka búninga. Í stað þess að þeytast á milli búða eða pósthúsa til að ná í sendingar er hægt að nota það sem er hendi næst og borga fyrir það nánast ekki neitt.

Fataslá með hrekkjavökubúningum í vinnunni eða í skólanum

Það getur verið sniðug og auðveld leið til að vera með umhverfisvænni hrekkjavökubúninga að setja upp búningaslá á næstu dögum. Auðvelt er að senda tölvupóst á starfsmenn eða nemendur og hvetja alla til að taka með grímubúninga sem eru ekki lengur í notkun á heimilinu og hengja á slána. Þar geta aðrir starfsmenn náð í búninga fyrir sig eða börnin sín. Hér er tilvalið að koma með búninga sem eru orðnir of litlir á börn sem eru oft svo fljót að vaxa upp úr búningum.

Búa til eigin búning úr því sem er til heima

Það getur verið bæði auðvelt, ódýrt og skemmtilegt að nýta það sem er til heima til að búa til eigin hrekkjavökubúning. Hér fyrir neðan eru 12 hugmyndir að búningum sem auðvelt er að gera úr því sem finnst heimafyrir. Ef eitthvað vantar í búninginn er hægt að aðlaga hann, kaupa notað eða fara yfir í næstu hugmynd.

1. Klassíski draugurinn. Allt sem þarf er gamalt lak og skæri. Búningurinn er klár þegar búið er að klippa augu á lakið. Bú!
2. Dýrabúningar, t.d. kisa, refur, einhyrningur eða hundur. Allt sem þarf er spöng og efnisbútur til að búa til eyru eða horn
3. Rauða drottningin úr Lísu í Undralandi. Allt sem þarf er rauður kjóll, spilastokkur og pappaspjald. Pappaspjaldið er nýtt til að búa til kraga sem spilin eru svo límd á
4. Fuglahræða. Allt sem þarf eru smekkbuxur, köflótt skyrta og stráhattur
5. Men in black. Allt sem þarf eru svört jakkaföt og sólgleraugu
6. Leðurblaka. Allt sem þarf er ónýt regnhlíf sem er klippt í tvennt og saumuð á hettupeysu
7. Sigurvegari. Allt sem þarf er svitaband og medalíur
8. Audrey Hepburn. Allt sem þarf er svartur kjóll og nokkrar perlufestar
9. Ræningi. Allt sem þarf er röndóttar bolur, svört húfa og svartar buxur. Hægt að setja toppinn yfir y-ið með því að teikna peningamerki á taupoka
10. Beinagrind. Allt sem þarf er hvítur gamall bolur og hlýrabolur. Búið til beinagrindamynstur í hvíta bolinn með því að klippa í hann og hafið hlýrabolinn svo fyrir innan
11. Wednesday Adams. Allt sem þarf er skyrta, svartur kjóll utanyfir og hárið fléttað í tvær fléttur.
12. Kaktus. Allt sem þarf er grænn bolur/ skyrta /kjóll og snæri. Snærið er saumað í græna bolinn hér og þar og þá er kominn kaktus.

Fleiri hugmyndir og nánari leiðbeiningar má finna hér.

Kaupa notaða búninga

Það er hægt að kaupa og auglýsa eftir hrekkjavökubúningum á allskonar grúppum á Facebook. Til dæmis Barnavörur til sölu eða Föt til sölu. Einnig geta hrekkjavökubúningar eða efniviður í hrekkjavökubúninga leynst í verslunum sem selja notuð föt.

• Fatabúðir Rauða Krossins  – um allt land. 
• Aftur nýtt – Sunnuhlíð 12, Akureyri. Básar þar sem hægt er að kaupa og selja notaðan fatnað. 
• Barnaloppan– Skeifunni 11, Reykjavík. Básar þar sem hægt er að kaupa og selja notaðar barnavörur. 
• Extraloppan – Smáralind. Þar er hægt að kaupa og selja notuð föt fyrir fullorðna. 
• Hertex – Reykjavík og Akureyri. Fata og nytjamarkaður. 
• Kringlubazaar – Kringlunni. Þar er hægt að kaupa og selja notuð föt fyrir bæði börn og fullorðna. 
• Spúútnik – Kringlunni og Laugavegi 28b, Reykjavík. Notuð föt til sölu. 
• Stína fína – Strandgötu 29, Hafnarfirði. Umboðssala á notuðum fatnaði, skóm og fleira fyrir konur. 
• Trendport – Hafnargata 60, Keflavík. Þar er hægt að kaupa og selja notuð föt fyrir bæði börn og fullorðna. 
• Wasteland Reykjavík – Ingólfsstræti 5, Reykjavík. Notuð föt til sölu. 
• Verzlanahöllin – Laugavegi 26, Reykjavík. Þar er hægt að kaupa og selja notuð föt. 

Fá lánaða búninga

Um að gera að spyrja ættingja, vini eða nágranna hvort þeir eigi einhverja búninga sem hægt er að fá lánaða. Það er líka hægt að leigja búninga hjá Saumsprettunni.

Sífellt fleiri halda hrekkjarvöku hátíðlega hér á landi og hafa tekið upp þann sið að skera út grasker. Á ári hverju eru á heimsvísu mörg þúsundir tonna af graskerum sem fara í ruslið eftir Hrekkjavöku án þess að nokkur hafi borðað innihald þeirra. Slík sóun skapar óþarfa álag á umhverfið. 

Grasker eru full af vítamínum og hægt að nýta á marga vegu. Einnig er hægt að nýta graskersfræin og neysla þeirra hefur góð áhrif á heilsuna, og því mikil sóun að henda þeim í ruslið. 

Ætt skraut

Það er hægt að skreyta fyrir Hrekkjavöku án graskera, t.d. með mandarínum, melónu, butternut squash eða öðru sem maður er viss um að maður vilji borða innan úr. Það er líka hægt að gera mat með hrekkjavökuþema úr öðru en graskerjum, t.d. múmíu pylsur, drauga sykurpúða og kóngulóa kökur.

Nýta innihald graskerja

Ef grasker eru notuð til skreytinga er mikilvægt að nýta innhald þeirra. Ef ekki gefst tími til að elda það um leið má skera það niður í bita og frysta.  Það er til dæmis tilvalið að nýta grasker í notalega heita súpu eða pottrétt yfir vetrartímann. 

Hér fyrir neðan eru nokkrar hugmyndir af uppskriftum en það er líka um að gera að nýta það sem er til og prófa sig áfram með að nota grasker í staðinn fyrir annað grænmeti sem maður er vanur að nota í aðra rétti! Til að draga úr matarsóun er mikilvægt að vera ófeimin við að skipta út innihaldi í uppskriftum og lagfæra magn til að nýta sem best það sem til er. 

Ætt skraut

Hrollvekjandi melónur

Skreyttar mandarínur

Drauga og múmíu brownies

Múmíu pylsur

Köngulóakökur

Graskers uppskriftir

Á uppskriftasíðu Saman gegn sóun má finna ýmsar uppskriftir sem hægt væri að nýta grasker í . Til dæmis er hægt að nota grasker í kókossúpu, diskósúpu eða eldað úr öllu kássu.  

Graskers marmelaði

Graskers vöfflur

Graskers baka

Graskers- og kókossúpa 

Graskers- og eplasúpa 

Graskers- og spínatlasagne 

Ofnbakað grasker sem meðlæti 

Ristuð graskersfræ   

Instagram inspo 

#eatyourpumpkin 

Stundum er matarsóun yfirvofandi og þá er mikilvægt að gefa matinn áfram. Þriðjudaginn 26. október stendur Velferðarvaktin fyrir málþinginu Mataraðstoð – ný framtíðarsýn? Málþingið fer fram í Hvammi, Grand hóteli, kl. 9.30-11.45 og er opið öllum. Þátttaka er gjaldfrjáls og verður boðið upp á kaffiveitingar. Þeir sem ætla að mæta til málþingsins á Grand hóteli þurfa að skrá sig hér. Þeir sem ætla að fylgjast með á streyminu þurfa ekki að skrá sig.

Kynntar verða skýrslur um fyrirkomulag mataraðstoðar og ráðgjafar hjálparsamtaka á Íslandi og á Norðurlöndum sem Félagsvísindastofnun Háskóla Íslands vann fyrir Velferðarvaktina og félagsmálaráðuneytið. Þá verða kynntar tilteknar aðgerðir í fyrstu heildstæðu aðgerðaráætlun stjórnvalda gegn matarsóun, sem umhverfis- og auðlindaráðherra lagði fram í september, en þar er meðal annars fjallað um matarbanka og matarvagn. Hér er dagskrá þingsins.

Dagskrá:

Kl. 9:30 Þingsetning

Siv Friðleifsdóttir, formaður Velferðarvaktar

Kl. 9:35 Kynning á mataraðstoð og ráðgjöf hjálparsamtaka á Íslandi og á Norðurlöndum

Ásdís Aðalbjörg Arnalds, Félagsvísindastofnun HÍ, kynnir niðurstöður tveggja skýrsla sem unnar voru fyrir Velferðarvaktina og félagsmálaráðuneytið:

Úttekt á fyrirkomulagi úthlutana og ráðgjafar hjálparsamtaka- Hvaða hópar leita aðstoðar?

Aðstoð hjálparsamtaka á Norðurlöndunum.

Kl. 10:10 Viðbrögð notenda, hvernig má auka valdeflingu?

Ásta Þórdís Skjalddal, samhæfingarstjóri PEPP-samtaka fólks í fátækt

Kl. 10:20 Er ávinningur af auknu samstarfi félagasamtaka sem sinna aðstoð?

Eydís Ösp Eyþórsdóttir, stjórnarmeðlimur í Velferðarsjóði Eyjafjarðarsvæðis, kynnir fyrir hönd samstarfsaðila um matar- og fjárhagsaðstoð á Eyjafjarðarsvæðinu

Kl. 10:30 Örstutt hlé

Kl. 10:40  Ný áætlun gegn matarsóun. Eru búðir/matarbankar snjöll leið?

• Guðmundur B. Ingvarsson, sérfræðingur í umhverfis- og auðlindaráðuneytinu, kynnir aðgerðir 7, 10, 19, 23 og 24 í áætluninni Minni matarsóun-Aðgerðaráætlun gegn matarsóun, frá 24. september 2021
• Rakel Garðarsdóttir, stofnandi Vakandi, samtaka um aukna vitundarvakningu varðandi sóun matvæla og
• Benedikt S. Benediktsson, lögfræðingur Samtaka verslunar og þjónustu, fjalla um hugmyndir um búðir/matarbanka með mjög ódýrum/ókeypis mat

Kl. 11:10 Umræða á borðum þar sem leitað verður svara við eftirfarandi spurningum:

1. Hvernig má taka meira tillit til óska notenda úr skýrslunni? 2. Er vilji til að auka samráð milli félagasamtaka og þá hvernig? 3. Er snjallt að koma upp sérstökum verslunum með ódýrum/ókeypis mat? 4. Hvernig verður fyrirkomulag aðstoðar eftir 10 ár?

Velferðarvaktin tryggir ritara á hvert borð sem tekur saman svarpunkta sem nýtast svo í framhaldinu í starfi vaktarinnar og víðar

Kl. 11:40 Lokaorð og málþingi slitið

Vilborg Oddsdóttir, formaður sárafátæktarhóps Velferðarvaktar

Streymt verður frá fyrstu dagskrárliðum málþingsins kl.9:30-11:10.

Varð afgangur af sunnudagssteikinni? Þá er upplagt að skella í eina steikarsamloku. Það skiptir í raun engu máli hvort að það var hnetusteik, lambasteik, eða nautasteik, niðurstaðan verður alltaf ljúffeng. Ekki verður það verra ef þú átt líka smá sósuslettu til að fylgja með.

Þetta var einmitt það sem @kopsdottir á instagram gerði. Hún skellti í eina mjög svo girnilega steikarsamloku með afgöngum frá því í gær.

Steikarsamloka Kópsdóttur

Innihald:

• steikar afgangar, sama hvaða steik
• sósu afgangar, sama hvaða sósa
• kartöflu afgangar, ef það er til
• grænmeti, það sem er til
• ostur
• spælt egg og beikon, ef það er til

Aðferð:

• Skerið afgangs kartöflur og steikið í olíu. Gott að krydda með hvítlaukskryddi eða öðru góðu gkryddi.
• Spælið egg og steikið beikon ef það er til
• Brauð smurt með skjöri og steikt á pönnu.
• Svo er öllu raðað á brauðið: sósa, afgangs steik, steiktar kartöflur, grænmeti, spælt egg og beikon

Hægt er að finna þessa uppskrift og fleiri uppskriftir gegn sóun hér. Við óskum @kopsdottir til hamingju með vel verðskulduð verðlaun í leiknum og sendum henni 10.000 króna gjafabréf frá Te & Kaffi sem þökk.